आज लक्ष्यात येतंय …

तू गेलीस - सुटलीस, बरं वाटलं …
असहाय शरीरात कित्येक दिवस कोंडलेलं तुझ्यातलं चैतन्य
एकदाचं मुक्त झालं -
पण हसऱ्या चेहऱ्यानं वेदना सोसायला शिकणं राहून गेलं
हे मात्र आज लक्ष्यात येतंय …

संपलं तुझं परावलंबित्व, बरं वाटलं …
थकलेल्या गात्रांना उत्साहाच्या पंखांनी दिलेलं बळ
शेवटी ओसरलं -
पण त्या न आटणाऱ्या उत्साहाचा उगम विचारायचं राहून गेलं
हे मात्र आज लक्ष्यात येतंय …

प्रसन्न जगलीस, बरं वाटलं …
समोर येईल ते आपलं मानून केवळ प्रेमच करणं
तुलाच जमलं -
पण प्रेम करून घेता घेता, तुला काही सांगायचं राहून गेलं
हे मात्र आज लक्ष्यात येतंय …