आईलाही द्यावं कधी माहेरपण

कबूल आहे तिचंच असतं घर
पण आईलाही हवं असेल का माहेरपण?

तिलाही असेलच ना ओढ माहेरपणाची
कारण तिथे नसते अपेक्षा वा सक्ती कश्याची
हवे असेल का तिलाहि हे मोकळेपण?
आईलाही हवं असेल का माहेरपण?

तिला ओळखणारं तिचंच अंगण
समजुतदारपणावर विश्वासालेल मोकळेपण
शरीर मनाला विसाव्याचे क्षण
आईलाही हवं असेल का माहेरपण?

द्यावा कधी चहा तिला सकाळी उठून
सांगावं मनातलं काही जवळ बसून
ऐकावं तिचंही होऊन मोठं आपण
आईलाही द्यावं कधी माहेरपण

उठू दे तिला कधी सर्वांच्या शेवटी
वाटून घ्यावी तिची काम सकाळची
कायम नको तिलाच जबाबदार्यांच दडपण
आईलाही द्यावं कधी माहेरपण

करु म्हणावं आज तुझ्या आवडीची भाजी
तेवढीही जाणीव तिला होईल पुरेशी
लक्षात ठेवू तिची आवड आणि नावड पण
आईलाही द्यावं कधी माहेरपण

आई आपल्या लेकीला मायेचे माहेर देते
पण त्याचे मोल लेकीच्या लक्ष्यात कधी येते?
जेव्हा ओसरतात तिचेही नवलाईचे क्षण
आईलाही हवं असेल का माहेरपण?

आईलाही हवा असेलच ना कधी विसावा;
वाटेल समजुतीचा हात तिच्या हाती असावा
ज्या हातांना तिनेच लावलंय वळण
आईलाही द्यावं कधी माहेरपण