मृत्यू

एक मृत्यू जन्माला घालतो,
अचानक…. एकटेपणा
आणि कुणी शोधत राहते
अस्तित्वाच्या पाऊलखुणा
एक मृत्यू उडवून टाकतो,
छप्परच - दुष्टपणे
आणि हरवतात अकालीच
कुठेतरी बालपणे
एक मृत्यू लावतो ओढ
अज्ञाताच्या वाटेची
पण कुणालाच चुकत नसते,
वाटचाल त्या आधीची
मग म्हणावे त्या मृत्यूला,
तू एक दगड मैलाचा
गाठणं आहे टप्पा मजला
पुढच्या अवघड वळणाचा
त्यांची आठवण, त्यांची शिकवण
गाठी आहे बरंच काही,
कारण काही गोष्टी हिरावून
तू ही घेऊ शकत नाहीस