आपण तरी..

 आपण तरी..

8 march 2023

आपण तरी नको बघुया आज

तिचा रंग, तिचं दिसणं..

ओठावरची लव नाही पडणार दृष्टीला

असं आहे तिचं मनमुराद हसणं!

आपण तरी नको करूया थट्टा

तिच्या हातचा स्वयंपाकाची, तिच्या अस्ताव्यस्त घराची.

प्रत्येक गोष्टीत प्रवीण असणारी

फक्त नायिकाच असते मालिकेची!

आपण तरी नको हसुया पाहून

लादी पुसणाऱ्या पुरुषाचे व्यंगचित्र.

घरचे काम वाटून घेणारा प्रत्येकजण

असतो माणुसकी जपणारा खरा मित्र

आपण तरी नको करूया कानगोष्टी

ऑफिसातून ती घरचे फोन करताना.

ऑफिसप्रमाणे तिची गरज

लागत असेलच की घरच्यांना.

आपण तरी नको पाहूया आज

भुवया उंचावून तिच्या कपड्यांकडे.

स्वतंत्र व्यक्ती म्हणून निवडीचे सुकाणू

असायला हवे ना तिच्याचकडे?

किमान आज तरी होऊया पुढे

'बाईच शत्रू बाईची' ची प्रथा मोडण्यासाठी.

तिच्याप्रमाणे करतच असतो ना आपणही कसरत,

तारेवरचा तोल सांभाळण्यासाठी?