लहान आणि मोठी

हिला खेळणी रंगीत संगीत
लांब कानातले तिच्यासाठी
कारण एक माझी लहान आहे
आणि एक जरा मोठी

हिच्या ब्रश ला लावते पेस्ट
तिच्या नुसतेच लागते पाठी
कारण एक माझी लहान आहे
आणि एक जरा मोठी

हिला कालवून देते भात
तिच्या पानात आमटीची वाटी
कारण एक माझी लहान आहे
आणि एक जरा मोठी

हि जेवायलाच तयार नाही
आणि तिचा हट्ट गोडासाठी
अहो एक माझी लहान आहे
आणि एक जरा मोठी

कधी मी हट्टाला पडते बळी
कधी शिस्तीच्या लागते पाठी
शेवटी एक माझी लहान आहे
आणि एक जरा मोठी

तू तिचेच जास्ती लाड करतेस
हे हि ऐकून घेते बेटी
कारण एक माझी लहान आहे
आणि एक जरा मोठी

धाकटी कधी मोठी होते
आणि मोठी होते छोटी
पण एक माझी लहान आहे
आणि एक जरा मोठी

मात्र कधीच कळत नाहीत
सिक्रेट त्यांच्या कानगोष्टी
जरी एक माझी लहान आहे
आणि एक जरा मोठी